ليلْ وسَهَرْ في بيروتْ

عَتمِه وقمرْ في بيروتْ

غُرْبِه ع شَطِّكْ

واحْجارْ منْ ياقوتْ

ومَراكبْ تِنْدَهْ ع البَحَّارَه

وصَدى النِدا مْنِ القَهِرْ مكبوتْ

***

توبِكْ الأبيضْ بيروتْ ما تِخْلَعي 

عروسةِ البُلدانْ ضَلِّي تْدَلّعي

غَنّي وصوتِكْ إرفَعي 

بوِجِّي اللي دَمَرّوا البْيوتْ

**

بيروتْ مهرِكْ عَ الغريبْ غالي

عِزِّه وكَرامِه وحفْنِةْ أماني

ما تِقْبلي بالغدِرْ يا بيروت

ولوْ كانِ الدَّهبْ تَمَنِ السِكوتْ

**

بكرا اولادِكْ بِكْبرو 

وع الحِّلمْ بيُوعو يِسْهرو

تا يِرْجَعو يُرُشُّو الوردْ

ع بلدْ ما بيموتْ

**

شِدِّي حيلِكْ يا بلدْ

وِآخيي بينْ البنتْ والولدْ

بالوِحدِه عيشي يا بيروتْ

وخلِّي هالشِعارْ بالفِكِرْ منحوتْ

**************************

ملاحظة: كتبتِ الكاتبة هذه القصيدة باللهجة الفلسطينية، العامية، مساء الثلاثاء بتاريخ 4.8.2020 بعد ساعة من حدوث الكارثة التي حلّت بالشعب اللبناني.